తారకమంత్రము కోరిన దొరికెను
తారక మంత్రము కోరిన దొరికెను
ధన్యుడ నైతిని ఓ రన్నా ||తారక మంత్రము||
మీరిన కాలుని దూతల పాలిటి
మృత్యువు యని మది నమ్మన్న ||తారక మంత్రము||
మచ్చికతో నితరాంతరమ్ముల
మాయలలో పడబోకన్నా
హెచ్చుగ నూట యెనిమిది తిరుపతు
లెలమి తిరుగ పనిలేదన్నా ||తారక మంత్రము||
ముచ్చటగా తా పుణ్యనదులలో
మునుగుట పని ఏమిటికన్నా
వచ్చెడి పరువపు దినములలో
సుడి వడుటలు మానకయున్న ||తారక మంత్రము||
ఎన్ని జన్మముల నుండి జూచినను
ఏకో నారాయణుడన్న
అన్ని రూపులై యున్న ఆ పరమాత్ముని
నామము కథ విన్నా ||తారక మంత్రము||
ఎన్ని జన్మముల చేసిన పాపము
యీ జన్మముతో విడునన్నా
అన్నిటికిది కడసారి జన్మము
సత్యంబిక పుట్టుట సున్నా ||తారక మంత్రము||
నిర్మల అంతర్లక్ష్య భావమున
నిత్యానందముతో నున్న
కర్మంబులు విడి మోక్ష పద్ధతిని
కన్నులనే జూచుచునున్న ||తారక మంత్రము||
ధర్మము తప్పక భద్రాద్రీశుని
తన మదిలో నమ్ముకయున్న
మర్మము తెలిసిన రామదాసు హృ
న్మందిరమున కేగుచునున్న ||తారక మంత్రము||
Comments
Post a Comment