అలర చంచలమైన ఆత్మలందుండ
అలర చంచలమైన ఆత్మలందుండ నీ యలవాటు చేసె నీవుయ్యాల |
పలుమారు నుచ్ఛ్వాస పవనమందుండ నీ భావంబు దెలిపె నీ వుయ్యాల ||
ఉదాయాస్త శైలంబు లొనర కంబములైన వుడుమండలము మోచే ఉయ్యాల |
అదన ఆకాశపదము అడ్డదూలంబైన అఖిలంబు నిండె నీ వుయ్యాల ||
పదిలముగ వేదములు బంగారు చేరులై పట్టవెరపై తోచే వుయ్యాల |
వదలకిటు ధర్మదేవత పీఠమై మిగుల వర్ణింప నరుదాయె వుయ్యాల ||అలర!!
మేలు కట్లయి మీకు మేఘమండలమెల్ల మెరుగునకు మెరుగాయె వుయ్యాల |
నీల శైలమువంటి నీ మేనికాంతికి నిజమైన తొడవాయె వుయ్యాల ||అలర!!
పాలిండ్లు కదలగా పయ్యెదలు రాపాడ భామినులు వడినూచు వుయ్యాల |
వోలి బ్రహ్మాండములు వొరగునో యని భీతి నొయ్య నొయ్యన నూచిరి ఉయ్యాల ||అలర!!
కమలకును భూసతికి కదలు కదలుకు మిమ్ము కౌగలింపగజేసె ఉయ్యాల |
అమరాంగనలకు నీ హావ భావ విలాసమందంద చూపెనీ వుయ్యాల ||అలర!!
కమలాసనాదులకు కన్నులకు పండుగై గణుతింప నరుదాయె వుయ్యాల |
కమనీయ మూర్తి వేంకటశైలపతి నీకు కడువేడుకై వుండె వుయ్యాల ||
Comments
Post a Comment