పలుకే బంగారమాయెనా కోదండపాణి
పలుకే బంగారమాయెనా కోదండపాణి || పలుకే ||
పలుకే బంగారమాయె పిలిచిన పలుకవేమి
కలలో నీ నామస్మరణ మరువ చక్కని సామి || పలుకే ||
ఇరువుగ ఇసుకలోన పొరలిన యుడుత భక్తికి
కరుణించి బ్రోచితివని నెర నమ్మితిని తండ్రి || పలుకే ||
రాతి నాతిగజేసి భూతలమందున ప్ర
ఖ్యాతి జెందితివని ప్రీతితో నమ్మితి తండ్రి || పలుకే ||
ఎంత వేడినా గానీ సుంతైన దయరాదు
పంతము చేయ నేనెంతటివాడను తండ్రి || పలుకే ||
శరణాగత త్రాణ బిరుదాంకితుడవుగావా
కరుణించు భద్రాచల వర రామదాస పోష || పలుకే ||
Comments
Post a Comment