ఇట్టి ముద్దులాడి
ప. ఇట్టి ముద్దులాడి బాలుడేడ వాడు
వాని పట్టి తెచ్చి పొట్టనిండ పాలు వోయరే!!
1. కామిడై పారితెంచి కాగెడి వెన్నెలలోన
చేమపూవు కడియాల చేయి వెట్టి
చీమ గుట్టెనని తన చెక్కిట కన్నీరు జార
వేమరువాపోవు వాని వెడ్డు బెట్టరే!!ఇట్టి!!
2. ముచ్చువలె వచ్చి తన ముంగ మురువుల చేయి
తచ్చెడి పెరుగులోన దగలబెట్టి
నొచ్చెననీ చేయి తీసి నోరనెల్ల జొల్లుగార
వొచ్చెలి వాపోవువాని నూరడించరే!!ఇట్టి!!
3. ఎప్పుడు వచ్చెనో మాయిల్లు చొచ్చి
పెట్టెలోని చెప్పరాని ఉంగరాల చేయిపెట్టి
అప్పడైన వేంకటాద్రి అసవాలకుడు గాన
తప్పకుండా పెట్టె వాని తలకెత్తరే!!ఇట్టి!!
Comments
Post a Comment